كتبت ومسحت
جيت اكتب حاجة، فكتبت مليون حاجة ومسحتهم. كتبت عن الفقر والجوع اللي حوالينا ومسحت. كتبت عن التطرف والعنصرية والكراهية والتعصب والعصبية اللي حوالينا ومسحت. كتبت عن كل واحد فاكر انه فاهم الدنيا وهو زيي مش فاهم حاجة بس مش عارف إنه كده، ومسحت. كتبت عن ان كل واحد فينا دايما متحيز بسبب عقليته ومعتقداته واحلامه وحالته مهما اعتقد انه محايد، ومسحت. كتبت عن قد ايه انا تعبت اني في حاجات كتير زي اللي بيكسر في جبل بخلّة سنان وخايف لحسن تتكسر منه ويفضل ورا الجبل، ومسحت. كتبت عن قد ايه نفسي اعرف اكتر وافهم اكتر من القليل اللي عندي، ومسحت. كتبت عن قد ايه نفسي اكون مثالي وأنا اساسا ابعد ما يكون عن المثالية، ومسحت. كتبت عن إنك قد إيه ممكن تحس إنك لوحدك وإنت وسط ناس كتير جدا، ومسحت. كتبت عن قد إيه أنا لسه بعيد عن المكان اللي نفسه أوصله، وإني خايف تكون سرعتي مش كفاية أو إن الطريق نفسه يطلع غلط، ومسحت. حتى كتبت عن قد ايه الكتابة نفسها شيء مرهق، ومسحت. مسحت عشان افتكرت حاجات حلوة، ولقيت بُقّي بالعافية إبتسم، وأنا عايز اعمل فيها مكشر.
No comments:
Post a Comment